सिरहामा बेपत्ता १३ वर्षीया बालिकाको शव बोरामा बेरिएको अवस्थामा फेला

जनकपुरधाम, चैत १२ गते ।  सिरहाको गोलबजार नगरपालिका–९ की १३ वर्षीया गुलशना खातुनको शव बोरामा बेरेर गाडिएको अवस्थामा फेला परेको छ।गत फागुन २९ गते घरबाट निस्केपछि बेपत्ता भएकी खातुनको शव इलाका प्रहरी कार्यालय मिर्चैयाको टोलीले वनमारा झाडीभित्र फेला पारेको हो। शव कुहिसकेको अवस्थामा भेटिएको छ।

गोलबजार–९ का पूर्व वडाध्यक्ष रामपुकार कामतीका अनुसार, "वनमारा झाडीबाट गन्ध आउन थालेपछि गाउँलेहरूले आशंका गरे र प्रहरीलाई खबर गरे। प्रहरी टोलीले उत्खनन गर्दा खातुनको शव बोरामा बेरिएको अवस्थामा खाडलभित्र गाडिएको फेला पर्‍यो।"इलाका प्रहरी कार्यालय मिर्चैयाका प्रहरी नायब उपरीक्षक (डीएसपी) सन्तबहादुर बाखुले घटनाको पुष्टि गर्दै भने, "घुर्मी खोलाको किनारमा करिब तीन फिट खनेपछि जुटको बोरामा बेरिएको अवस्थामा शव फेला परेको छ। बालिकाको हत्या गरी गाडिएको देखिन्छ। घटनाबारे थप अनुसन्धान भइरहेको छ।" बालिकाकी आमा जाहेदा खातुनले चैत १ गते नै इलाका प्रहरी कार्यालय मिर्चैयामा खोजतलासको निवेदन दिएकी थिइन्। गुलशना खातुन स्थानीय सामुदायिक विद्यालयमा कक्षा ४ मा अध्ययनरत थिइन्। प्रहरीले घटनाको विस्तृत अनुसन्धान अघि बढाइसकेको छ।