राजसंस्था पुनर्स्थापनाका लागि संयुक्त जनआन्दोलन समितिको चैत १५ मा प्रदर्शन घोषणा

काठमाडौं, चैत १२ गते । नवराज सुवेदी नेतृत्वको ‘राजसंस्था पुनर्स्थापनाका लागि संयुक्त जनआन्दोलन समिति’ले चैत १५ गते राजधानीमा जनप्रदर्शन गर्ने घोषणा गरेको छ। समितिले मंगलबार जारी गरेको विज्ञप्तिमा सम्पूर्ण राजसंस्थावादी, हिन्दू अधिराज्य समर्थक तथा सङ्घीयता विरोधी समूहहरूलाई प्रदर्शनमा सहभागी हुन आह्वान गरिएको छ।

समितिका संयोजक नवराज सुवेदीले नेपाल अहिले विशिष्ट राजनीतिक संक्रमणबाट गुज्रिरहेको भन्दै देशभक्त तथा राजसंस्थावादीहरू एकजुट हुनुपर्ने आवश्यकता रहेको बताएका छन्। उनले राजधानी केन्द्रित सबै राजसंस्थावादी प्रदर्शनहरूमा समिति पूर्ण रूपमा संलग्न रहने समेत स्पष्ट गरेका छन्।

यता, सोही दिन समाजवादी मोर्चाले राजावादी गतिविधिहरूको विरोधमा राजधानीमै प्रदर्शन गर्ने तयारी गरेको छ। राजधानीमा एकैदिन दुई फरक विचारधाराका समूहबीच प्रदर्शन हुन लागेकाले सुरक्षा अवस्था थप संवेदनशील बन्न सक्ने देखिन्छ।