कुलमान घिसिङको पदमुक्ति : सरकारको निर्णयविरुद्ध काँग्रेस महामन्त्रीहरूको असहमति

काठमाडौं, चैत १२ गते । नेपाल विद्युत् प्राधिकरणका कार्यकारी निर्देशक कुलमान घिसिङलाई हटाउने सरकारको निर्णयविरुद्ध सत्तारूढ नेपाली काँग्रेसका महामन्त्रीहरू गगन थापा र विश्वप्रकाश शर्माले सार्वजनिक रूपमा असहमति जनाएका छन्। सोमबार साँझ बसेको मन्त्रिपरिषद् बैठकले घिसिङलाई हटाएर हितेन्द्रदेव शाक्यलाई नियुक्त गरेको थियो। निर्णय सार्वजनिक भएलगत्तै काँग्रेस महामन्त्रीद्वयले सामाजिक सञ्जालमार्फत् सरकारको कदमको आलोचना गरेका हुन्। गगन थापाले सरकारको निर्णयले जनमानसमा असन्तोष बढाउने भन्दै सरकारकै असफलतामा केही पक्षले फाइदा उठाउने सम्भावना रहेको उल्लेख गरेका छन्। त्यस्तै, विश्वप्रकाश शर्माले कांग्रेस पदाधिकारी तहमा घिसिङ हटाउने विषयमा कुनै सहमति नभएको बताउँदै सरकारले उक्त निर्णय फिर्ता लिनुपर्ने बताएका छन्।

ऊर्जामन्त्री दीपक खड्का नेतृत्वमा अघि बढाइएको घिसिङको बर्खास्तीबारे अन्य मन्त्रीहरूभित्र पनि फरक धारणा देखिएको थियो। गृहमन्त्री रमेश लेखकले मन्त्रिपरिषद् बैठकमा नै उक्त निर्णय अदालतसम्म जाने सम्भावना रहेको भन्दै सरकारलाई पुनर्विचार गर्न सुझाव दिएका थिए। उता, नेकपा माओवादी अध्यक्ष पुष्पकमल दाहाल ‘प्रचण्ड’ ले पनि सरकारको निर्णयलाई आपत्तिजनक भन्दै कुलमान घिसिङलाई हटाउनु गलत भएको बताएका छन्। घिसिङले कार्यसम्पादन सम्झौताअनुसार निर्धारित लक्ष्य हासिल गरेको प्रमाण पेश गरिसकेको भए पनि सरकारले उनलाई पदमुक्त गर्ने निर्णय गरेको छ। यसले सरकारभित्रै मतभेद उत्पन्न गराएको देखिन्छ, भने सर्वसाधारण र राजनीतिक वृत्तमा व्यापक प्रतिक्रिया जन्माएको छ।