धनुषामा युवक हत्या प्रकरण: श्रीमती पक्राउ, अनुसन्धान जारी

जनकपुरधाम,चैत ११ गते । धनुषाको क्षीरेश्वरनाथ नगरपालिका–८, दिगम्बरपुरका २५ वर्षीय शिवशंकर महतो हत्या प्रकरणमा प्रहरीले उनकी श्रीमती सिर्जनालाई पक्राउ गरेको छ। जिल्ला प्रहरी कार्यालय महोत्तरीका अनुसार प्रारम्भिक अनुसन्धानकै क्रममा श्रीमतीमाथि आशंका गर्दै उनलाई नियन्त्रणमा लिइएको हो। साथै, शिवशंकरलाई मोटरसाइकलमा लगेको व्यक्तिको पहिचानसमेत भइसकेको प्रहरीले जनाएको छ।

शिवशंकरको शव महोत्तरीको गौशाला नगरपालिका–८, सागरनाथ वन क्षेत्रमा रेल्वे ट्र्याकबाट करिब १०० मिटर दक्षिण फेला परेको थियो। प्रहरीले शवको प्रकृति हेर्दा धारिलो हतियार प्रहार गरी हत्या गरिएको निष्कर्ष निकालेको छ। साथै, हत्या गरिसकेपछि शव घिसारेर अन्यत्र लैजान खोजिएको देखिएको छ। हाल शव पोस्टमार्टमका लागि प्रादेशिक अस्पताल जलेश्वरमा राखिएको छ। शिवशंकर करिब डेढ महिना अघि मात्र मुम्बईबाट धनुषा फर्किएका थिए।