सांसद सिंहद्वारा महिला र दलितमाथि बढ्दो हिंसाप्रति सरकारको ध्यानाकर्षण

काठमाडौं, चैत ७ गते ।स्वतन्त्र सांसद अमरेशकुमार सिंहले महिला र दलित समुदायमाथि भइरहेका हत्या, हिंसा र विभेदका घटनाहरू तुरुन्त रोक्न र दोषीलाई कारबाही गर्न सरकारको ध्यानाकर्षण गराएका छन्। बिहीबार प्रतिनिधि सभाको बैठकमा बोल्दै उनले देशभर यस्ता घटनाहरू बढिरहेको उल्लेख गर्दै, वर्तमान सरकारको पालामा किन यस्तो भइरहेको छ भनी प्रश्न गरे। साथै, उनले मधेश प्रदेशमा दलितमाथि भइरहेको दमनका विरुद्ध प्रदेश सरकार नबोल्नु सत्ता बाँडफाँडको कारण त होइन भनी आशंका व्यक्त गरे।​

सांसद सिंहले काठमाडौँ महानगरपालिकाले कवाडी व्यवसायीमाथि डोजर चलाएको घटनाप्रति पनि आपत्ति जनाउँदै, महानगर प्रमुखले नाजीवाद वा फासीवादको अगुवाजस्तो व्यवहार गरेको आरोप लगाए। त्यसैगरी, सांसद सन्तोष परियारले दलित समुदायमाथि हुने जातीय विभेदविरुद्ध ठोस कानुन बनाएर अघि बढ्न माग गरे, भने सांसद अब्दुल खानले बलात्कारका घटनाहरू बढिरहेको तथ्याङ्क प्रस्तुत गर्दै दोषीलाई कानुनी कारबाहीको दायरामा ल्याउन माग गरे।