त्रिवि स्ववियु निर्वाचन : नेविसंघको अग्रता कायम

काठमाडौं, चैत ६ गते । त्रिभुवन विश्वविद्यालय (त्रिवि) अन्तर्गत स्ववियु निर्वाचनको मतगणना जारी रहँदा नेपाल विद्यार्थी संघ (नेविसंघ) ले अग्रता लिइरहेको छ। पछिल्लो परिणामअनुसार, नेविसंघले ९९ कलेजमा स्ववियु अध्यक्ष पद जितेको छ भने केही कलेजहरूमा पूर्ण प्यानल नै विजयी भएको छ। दोस्रो स्थानमा रहेको अनेरास्ववियुले ८६ कलेजमा अध्यक्ष पद जित्दा, तेस्रो स्थानमा रहेको अखिल (क्रान्तिकारी) ले ७३ कलेजमा सफलता प्राप्त गरेको छ।

काठमाडौं उपत्यकाका कलेजहरूको मतपरिणाम आउने क्रम जारी छ। नेपाल कमर्स क्याम्पस र महेन्द्ररत्न क्याम्पस ताहाचलमा अनेरास्ववियुका उम्मेदवार विजयी भएका छन्। कमर्स क्याम्पसमा विशाल रोकाहा तथा महेन्द्ररत्नमा ईश्वर थापा अध्यक्ष पदमा निर्वाचित भएका छन्। यस्तै, थापाथली इन्जिनियरिङ क्याम्पसमा प्रल्हाद खड्का र महाराजगन्ज नर्सिङ क्याम्पसमा बिन्दु पोखरेल अध्यक्षमा विजयी हुँदै नेविसंघको पकड देखिएको छ।

अखिल (क्रान्तिकारी) ले जनप्रशासन क्याम्पस र सानोठिमी बहुमुखी क्याम्पस भक्तपुरमा जित निकालेको छ, जहाँ अनिकेत तिवारी र नरेन्द्र ठगुन्ना क्रमशः अध्यक्षमा निर्वाचित भएका छन्। पुलचोक इन्जिनियरिङ क्याम्पसमा भने स्वतन्त्र उम्मेदवार स्वयं श्रेष्ठले जित निकालेका छन्। चैत ५ गते सम्पन्न निर्वाचनमा देशभरका ३८ वटा आंगिक क्याम्पस तथा करिब ३०० सम्बन्धन प्राप्त क्याम्पसहरूमा मतदान सम्पन्न भएको थियो।