राजतन्त्र फर्किने सम्भावना छैन : सांसद विमलेन्द्र निधि

काठमाडौं, चैत ६ गते । नेपाली कांग्रेसका सांसद विमलेन्द्र निधिले नेपालमा राजतन्त्र पुनःस्थापना हुने कुनै सम्भावना नरहेको बताएका छन्। प्रतिनिधिसभा बैठकमा बोल्दै उनले राजावादीहरूलाई अनावश्यक सपना नदेख्न चेतावनी दिए। निधिले लोकतान्त्रिक प्रणाली जनताले नै चुनेको व्यवस्था भएकाले राजतन्त्र फर्कन नसक्ने स्पष्ट पारे।

सांसद निधिले पूर्वराजा ज्ञानेन्द्र शाहलाई धैर्यताको सीमा पार नगर्न सचेत गराउँदै लोकतान्त्रिक प्रणालीविरुद्ध कुनै गतिविधि नगर्न आग्रह गरे। उनले जनताले अस्वीकार गरिसकेको राजतन्त्रलाई फर्काउने प्रयास व्यर्थ हुने बताए। उनका अनुसार नेपाली जनताले लोकतन्त्रका लागि संघर्ष गरेको इतिहासलाई नजरअन्दाज गर्न सकिँदैन।

राजनीतिक अधिकारबाट वञ्चित गरिएकाले आफूले निरंकुश राजतन्त्र र निर्दलीय पञ्चायती व्यवस्थाविरुद्ध लड्दा जेल जानुपरेको निधिले स्मरण गराए। उनले निरंकुश राजतन्त्रका कारण हजारौं युवा विद्यार्थीहरू जेल परेका उल्लेख गर्दै, नेपाली जनताले भोगिसकेको विगत नदोहोर्‍याउन चेतावनी दिए।