सांसद राणाको दाबी: "गणतन्त्र असफल, मुलुकलाई सनातन हिन्दु राज्यतर्फ लैजानु पर्छ"

काठमाडौं,चैत ४ गते । राष्ट्रिय प्रजातन्त्र पार्टीका सांसद धवलशमशेर राणाले लोकतान्त्रिक गणतन्त्रात्मक व्यवस्था असफल भइसकेको दाबी गर्दै नेपाललाई पुनः सनातन हिन्दु राज्य बनाउनुपर्ने बताएका छन्। प्रतिनिधिसभाको शून्य समयमा बोल्दै उनले वर्तमान राजनीतिक प्रणालीले देशलाई संकटतर्फ धकेलेको र आम नागरिकले सनातन हिन्दु राज्यको माग गरिरहेको उल्लेख गरे।

सांसद राणाले मुलुकको वर्तमान परिस्थितिलाई परिवर्तनको संकेत भन्दै गणतन्त्र हटाई हिन्दु राज्य पुनःस्थापना गर्नुपर्ने धारणा व्यक्त गरे। उनले भने, "देशमा परिवर्तनको हावा चलिसक्यो। देश पूर्णरूपमा असफल भइसक्यो। जनताले सनातन हिन्दु राज्य चाहेका छन्। त्यसैतर्फ जाउँ। असफल भएको गणतन्त्र हटाउँ।"

उनको यस भनाइले राजनीतिक वृत्तमा तरंग पैदा गरेको छ। गणतन्त्र समर्थकहरूले यसलाई लोकतान्त्रिक मूल्यविपरीतको अभिव्यक्ति भनेका छन्, भने उनका समर्थकहरूले नेपालको मौलिक पहिचान र धार्मिक विरासत जोगाउन यो आवश्यक कदम भएको तर्क गरिरहेका छन्।