बर्दिबासमा ५४७ किलो गाँजासहित मिनी ट्रक पक्राउ

जनकपुरधाम,चैत ४ गते । बर्दिबास प्रहरीले ५४७ किलो तयारी गाँजासहित मिनी ट्रक र यसको चालकलाई नियन्त्रणमा लिएको छ। इलाका प्रहरी कार्यालय बर्दिबास तथा लागुऔषध नियन्त्रण ब्युरोको संयुक्त टोलीले सिन्धुलीबाट बर्दिबासतर्फ आउँदै गरेको बा ३ ख ५८३२ नम्बरको नीलो मिनी ट्रकलाई जाँच गर्ने क्रममा उक्त परिमाणको गाँजा फेला पारेको हो।

बिपी राजमार्ग अन्तर्गत बर्दिबास-३ स्थित क्षेत्रमा आइतबार साँझ ट्रकको जाँच गर्दा फल्स बटनभित्र रातो प्लास्टिकमा राखिएका ३५ पोका गाँजा बरामद गरिएको इलाका प्रहरी बर्दिबासका प्रहरी नायव उपरीक्षक रेवती रमण पोखरेलले जानकारी दिनुभयो। प्रहरीले विशेष सूचनाका आधारमा निगरानी बढाउँदै आएको र सोही क्रममा उक्त गाँजा बरामद गरिएको जनाइएको छ।

गाँजा तस्करीमा संलग्न रहेको आशंकामा प्रहरीले ट्रक चालकलाई नियन्त्रणमा लिएको छ। पक्राउ परेका व्यक्ति सिन्धुपाल्चोक बाहृबीसे-७ निवासी ३७ वर्षीय सलिन मगर रहेको खुलेको छ, जो हाल काठमाडौंको टोखा ग्रिनल्यान्ड क्षेत्रमा डेरा गरी बस्दै आएका थिए। घटनासम्बन्धी थप अनुसन्धान भइरहेको बर्दिबास प्रहरीले जनाएको छ।