होली खेल्ने क्रममा विवाद, छुरी प्रहारबाट युवकको मृत्यु

जनकपुधाम, चैत ३ गते ।  होली खेल्ने क्रममा शनिबार साँझ जनकपुरधाम उपमहानगरपालिका–२३ बिन्धी चोकमा भएको विवादका कारण छुरी प्रहारबाट एक युवकको मृत्यु भएको छ। जिल्ला प्रहरी कार्यालय धनुषाका अनुसार १९ वर्षीय आँशु यादवको छुरी प्रहारबाट मृत्यु भएको हो।

प्रहरीका अनुसार छुरी प्रहार गरेको आरोपमा जनकपुरधाम–२३ निवासी २१ वर्षीय धर्मेन्द्र महतो पक्राउ परेका छन्। प्रारम्भिक अनुसन्धानका क्रममा होली खेल्ने क्रममा सामान्य विवाद उत्पन्न भएपछि झगडा भएको र त्यसै क्रममा महतोले छुरी प्रहार गरेको खुलेको छ। गम्भीर घाइते भएका आँशुलाई अस्पताल पुर्‍याइए पनि उपचारका क्रममा उनको मृत्यु भएको प्रहरीले जनाएको छ।

मधेसका अधिकांश जिल्लामा शुक्रबार नै होली मनाइएको भए पनि जनकपुरधाममा शनिबार होली मनाइएको थियो। यसै क्रममा घटेको घटनाबारे थप अनुसन्धान भइरहेको जिल्ला प्रहरी कार्यालय धनुषाका प्रवक्ता तथा प्रहरी नायव उपरीक्षक (डीएसपी) वरुणकुमार सिंहले जानकारी दिएका छन्।