पर्सामा साथीको हत्या आरोपमा तीन जना पक्राउ

जनकपुरधाम, फागुन १६ गते ।पर्सा प्रहरीले आफ्नै साथीको हत्या गरेको आरोपमा वीरगन्ज महानगरपालिका वडा नम्बर २७ का १९ वर्षीय मुकेशप्रसाद यादव, अरुणकुमार यादव र मुना तिवारीलाई पक्राउ गरेको छ। प्रहरीका अनुसार उनीहरूले इशालप्रसाद कुर्मीलाई तास खेल्दा भएको विवादपछि हत्या गरी भेडाहा खोलामा फालेका थिए।

जिल्ला प्रहरी कार्यालय पर्साका प्रमुख प्रहरी उपरीक्षक गौतम मिश्रका अनुसार, फागुन ७ गते १९ वर्षीय इशालप्रसाद कुर्मी घरबाट काम गर्न जाने भन्दै निस्किएका थिए। अबेर रातिसम्म घर नफर्किएपछि परिवारले फागुन ८ गते प्रहरीमा निवेदन दिएका थिए। खोजतलासको क्रममा फागुन ११ गते भेडाहा खोलामा कुर्मीको शव फेला परेको थियो।

अनुसन्धानमा फागुन ७ गते तास खेल्दा ३५ सय रुपैयाँको विवाद भएको र सोही क्रममा मुकेशप्रसाद यादव, अरुणकुमार यादव र मुना तिवारीले मिलेर कुर्मीको हत्या गरेको खुलासा भएको छ। पक्राउ परेका तीन जनालाई ज्यानसम्बन्धी कसुरमा ६ दिनको म्याद थप गरी अनुसन्धान जारी रहेको प्रहरीले जनाएको छ।