जनकपुर अन्तर्राष्ट्रिय फिल्म महोत्सव: तयारी सम्पन्न, विश्व सिनेमा संग सेतु स्थापना

जनकपुरधाम, फागुन १४ गते । जनकपुरधाममा आयोजना हुन गइरहेको जनकपुर अन्तर्राष्ट्रिय फिल्म महोत्सवको तयारी पूर्ण भएको छ। आयोजक संस्था संवाद फाउण्डेशनले बुधवारको पत्रकार सम्मेलनमार्फत यस उपलब्धिको घोषणा गर्दै, महोत्सवले नेपाली चलचित्र साक्षरताको प्रवर्द्धन, विविध चलचित्र प्रदर्शन, कार्यशाला तथा मास्टर क्लासहरूमार्फत चलचित्रलाई एक शक्तिशाली माध्ययमको रूपमा परिचित गराउने उद्देश्य रहेको जानकारी दिए।

संवाद फाउण्डेशनका अध्यक्ष कुमार भास्करका अनुसार, महोत्सवले स्थानीय र विश्व सिनेमा बीचको सेतुको रूपमा नेपाली चलचित्रलाई विश्वभरका दर्शकहरूसम्म पुर्याउने र अन्य देशका चलचित्र तथा कथाहरूसँग गहिरो सम्बन्ध स्थापना गर्ने लक्ष्य राखेको छ। यसैगरी, महोत्सवले नेपाली युवालाई प्रेरणा र अवसर प्रदान गर्ने साथै फिल्म निर्माता र कलाकारबीच अनुभव आदानप्रदानका लागि एक अन्तरक्रियात्मक मंचको रूपमा काम गर्ने आशा गरिएको छ, जसले नेपाल र अन्तर्राष्ट्रिय समुदायबीच सांस्कृतिक सहकार्य र सामिप्यता बढाउने अपेक्षा गरिएको छ।

हालसम्म १४४ भन्दा बढी देशका चलचित्रकर्मीहरूद्वारा ३५००+ आवेदन प्राप्त भएको जानकारी दिएर अध्यक्ष भास्करले बताउनुभयो कि महोत्सवकालागि १० विधाबाट चयन गरिएका कुल ७८ वटा फिल्म प्रदर्शनीमा राखिनेछ र प्रत्येक विधामा सर्वोत्कृष्ट फिल्मलाई पुरस्कार प्रदान गरिनेछ। कार्यक्रम फागुन १६ गतेदेखि १८ गतेसम्म मैथिली विकास कोषको सभा भवनमा आयोजना हुने भएकाले, यसले क्षेत्रीय तथा अन्तर्राष्ट्रिय चलचित्र प्रेमीहरूलाई आकर्षित गर्ने निश्चित देखिन्छ।