सिरहा बलात्कार र मृत्यु प्रकरण: तीन जनामाथि पाँच दिनको म्याद थप

जनकपुरधाम,फागुन १३ गते । सिरहा जिल्लाको नवराजपुर गाउँपालिका-१ भगवतीपुरकी १७ वर्षीया रिंकुकुमारी सदाको सामूहिक बलात्कार र शंकास्पद मृत्यु घटनामा तीन जनामाथि पाँच दिनको म्याद थप गरिएको छ। जिल्ला प्रहरी कार्यालय सिरहाका अनुसार, स्थानीय चन्देश्वर मण्डल, रामविनोद मण्डल, र कमलेश दासलाई थप अनुसन्धानका लागि सिरहा जिल्ला अदालतबाट सोमबार पाँच दिनको म्याद लिइएको हो।

प्रहरीले आइतबार चार जनालाई नियन्त्रणमा लिए पनि, एक जना निर्दोष ठहरिएपछि रिहा गरिएको छ। प्रारम्भिक अनुसन्धानले लेनदेन गरी मिलापत्र गराउने कार्यमा उनीहरूको संलग्नता देखाएको छ। घटनाका मुख्य आरोपितहरू भने अझै फरार छन्। पीडित परिवारले गत बिहीबार कर्तव्य ज्यान, शरीर बन्धक, जबर्जस्ती करणी, र आत्महत्या दुरुत्साहनको पूरक जाहेरी दिएका थिए।

माघ २७ गते राति शौच गर्न गएकी रिंकुकुमारी गाउँकै तीन व्यक्तिबाट अपहरण र सामूहिक बलात्कारमा परेकी थिइन्। तर, वडासदस्य नथुनी साह लगायतका स्थानीयले घटना गाउँमै मिलाउन पञ्चायती गरेका थिए। पञ्चायतीले पीडकबाट १ लाख ४० हजार रुपैयाँ जरिवाना भराउने निर्णय गरे पनि, आरोपितका आफन्तबीच विवाद भएपछि माघ ३० गते साँझ रिंकुकुमारी आफ्नै घरमा झुन्डिएको अवस्थामा मृत फेला परेकी थिइन्।