सिरहामा किशोरीको सामूहिक बलात्कार र मृत्यु प्रकरणमा चार जना पक्राउ

जनकपुरधाम, फागुन १२ गते । सिरहा जिल्लाको नवराजपुर गाउँपालिका-१ भगवतीपुरकी १७ वर्षीया रिंकु कुमारी सदाको सामूहिक बलात्कार र रहस्यमय मृत्यु प्रकरणमा प्रहरीले चार जनालाई पक्राउ गरेको छ। छानबिन समितिका संयोजक एवं एसएसपी शान्तिराज कोइरालाका अनुसार, पक्राउ परेकाहरूमा पञ्चायती बस्नेदेखि प्रत्यक्षदर्शीसम्मका व्यक्ति समावेश छन्। उनले अनुसन्धानपछि केहीलाई रिहा गर्न सकिने र कसैलाई मतियारका रूपमा मुद्दा चलाउन सकिने जानकारी दिए।​

यसअघि, फागुन ८ गते कर्तव्य ज्यान, जबर्जस्ती करणी, शरीर बन्धक तथा लेनदेन मिलापत्र सम्बन्धी चारवटा मुद्दामा आठ जनाविरुद्ध पूरक जाहेरी इलाका प्रहरी कार्यालय, लहानमा दर्ता गरिएको थियो। माघ ३० गते आफ्नै घरमा झुन्डिएको अवस्थामा मृत फेला परेकी रिंकुमाथि माघ २७ गते राति शौच गर्न बाहिर निस्कँदा सामूहिक बलात्कार भएको खुलेको छ।​

घटनालाई दबाउन माघ २९ र ३० गते वडासदस्यसहित स्थानीयहरूको संलग्नतामा गाउँमै पञ्चायत बसालेर मिलापत्र गर्ने प्रयास भएको थियो। उक्त पञ्चायतीमा पीडक पक्षबाट १ लाख ४० हजार रुपैयाँ जरिवाना भराउने र पीडित पक्षलाई प्रहरीमा उजुरी नदिन बाध्य पार्ने निर्णय गरिएको खुलासा भएको छ।