नेपाल-भारतमा आपराधिक गतिविधिमा संलग्न फरार अभियुक्त पक्राउ

जनकपुरधाम, माघ ३० गते ।  नेपाल र भारतका विभिन्न स्थानमा डकैती, लुटपाट तथा अपहरण जस्ता गम्भीर आपराधिक घटनामा संलग्न एक फरार अभियुक्त पक्राउ परेका छन्। मोरङ ग्रामथान गाउँपालिका–२ का ४० वर्षीय खड्क नारायण माझीलाई महोत्तरी र मोरङ प्रहरीको संयुक्त टोलीले माघ २५ गते मोरङबाट पक्राउ गरेको हो। जिल्ला प्रहरी कार्यालय महोत्तरीका सूचना अधिकारी नन्दकिशोर प्रसाद चौहानका अनुसार माझी नेपालका महोत्तरी, सम्सी, गौशाला तथा भारतको सितामढी जिल्लामा आपराधिक गतिविधिमा संलग्न रहेको आरोपमा प्रहरीको खोजी सूचीमा थिए।

पक्राउ परेपछि उनलाई जिल्ला प्रहरी कार्यालय महोत्तरीमा ल्याएर आवश्यक अनुसन्धान गरिएको थियो। अनुसन्धानपछि माघ २८ गते जिल्ला अदालत महोत्तरीमा पेश गरिएका माझीलाई अदालतको आदेशअनुसार पुर्पक्षका लागि जलेश्वर कारागार चलान गरिएको प्रहरीले जनाएको छ।