विवाहको रमाइलोबीच ग्याङ फाइट, खुकुरी आक्रमणमा एक जनाको ज्यान गयो

काठमाडौं, माघ २८ गते । बाँकेको बैजनाथ गाउँपालिका–८ पुष्पनगर बीचलाइनमा भएको ‘ग्याङ फाइट’का क्रममा खुकुरी प्रहारबाट घाइते भएका दिनेश रोकायाको मृत्यु भएको छ। जिल्ला प्रहरी कार्यालय बाँकेका अनुसार रोकायाको उपचारका क्रममा भारतको लखनउमा निधन भएको हो।

प्रहरीका अनुसार स्थानीय सुवास बुढाको बिहेपछि दुलही भित्र्याउने क्रममा रमाइलो भइरहेकै बेला मदिरा सेवन गरेका युवाहरूबीच विवाद उत्पन्न भएको थियो। विवाद बढ्दै जाँदा दुलाहाका भिनाजु रामबहादुर रानाको समूह र छिमेकी दिनेश रोकायाको समूहबीच झडप भएको थियो। झडपका क्रममा रानाले रोकायामाथि खुकुरी प्रहार गर्दा उनी गम्भीर घाइते भएका थिए।

घटनामा संलग्न रहेको आरोपमा प्रहरीले बैजनाथ गाउँपालिका–२ का ३५ वर्षीय रामबहादुर रानासहित ६ जनालाई पक्राउ गरेको छ। पक्राउ पर्नेहरूमा बैजनाथ–२ की ३० वर्षीया मनीषा राना, बैजनाथ–६ का १८ वर्षीय भिजन नेपाली, जाजरकोट शिवालय–७ का २९ वर्षीय हिमबहादुर बुढा, दाङ बबई गाउँपालिका–६ की २७ वर्षीया अमृता डाँगी, र बैजनाथ–८ का १८ वर्षीय सुजन बुढा रहेका छन्।

घटनापछि स्थानीय क्षेत्रमा भागदौड मच्चिएको थियो। प्रहरी प्रवक्ता डिएसपी आयुषप्रसाद जोशीका अनुसार घाइते अन्य पाँच जनाको कोहलपुर मेडिकल कलेजमा उपचार भइरहेको छ। पक्राउ परेकाहरूलाई कर्तव्य ज्यान मुद्दामा म्याद थप गरी अनुसन्धान अगाडि बढाइएको प्रहरी प्रवक्ताले जानकारी दिएका छन्।