शैक्षिक परिवर्तनको आवश्यकतामा मुख्यमन्त्री सिंहको जोड

जनकपुरधाम, माघ १४ गते । मधेश प्रदेशका मुख्यमन्त्री सतिशकुमार सिंहले शिक्षामा समयअनुसारको परिवर्तन अत्यावश्यक रहेको बताउनुभएको छ। जनकपुरधाममा प्रधानाध्यापक संघ नेपालद्वारा आयोजित "प्रधानाध्यापकसँग मुख्यमन्त्री संवाद: शिक्षा सुधार र भविष्यको दृष्टिकोण" कार्यक्रममा उहाँले प्रदेशको शैक्षिक स्तर खस्किँदै गएको चर्चा गर्दै सात जिल्लामा साक्षरताको कमीप्रति चिन्ता व्यक्त गर्नुभयो। “विद्यालयमा परम्परागत आधारमा शिक्षा दिइँदै आएको छ, त्यसलाई आधुनिकताका आधारमा परिवर्तन गर्न जरुरी छ,” उहाँले भन्नुभयो। आधुनिक शिक्षाको कार्यान्वयन र वर्तमान शिक्षा नीति तथा शैलीमा सुधार गरी प्रदेशलाई साक्षर बनाउन गहन छलफल र बहस आवश्यक रहेको उहाँले जोड दिनुभयो।

मुख्यमन्त्री सिंहले प्रदेशको मातहतमा प्रारम्भिक शिक्षाको अधिकार नहुँदा शैक्षिक गुणस्तरमा कमी आएको बताउनुभयो। उहाँले प्रदेशलाई उच्च शिक्षाको अधिकार भए पनि बालविकासदेखि कक्षा १२ सम्मको शिक्षामा सुधार नआउँदासम्म उच्च शिक्षाको अर्थ नरहने धारणा राख्नुभयो। व्यवस्थापन समितिहरूको राजनीतिक हस्तक्षेपले शैक्षिक गुणस्तर खस्किएको औँल्याउँदै उहाँले विद्यालय व्यवस्थापन समितिमा सुधार, शिक्षकहरूको समयमै तलब व्यवस्थापन, र आधुनिक प्राविधिक शिक्षामा जोड दिनुपर्नेमा जोड दिनुभयो। शिक्षालाई पहिलो प्राथमिकतामा राख्न नसक्दा नेपालको शैक्षिक अवस्था कमजोर बनेकोमा दुःख व्यक्त गर्दै उहाँले गुणस्तरीय शिक्षा सुनिश्चित गर्न सबै क्षेत्रले बहस र सहकार्य गर्नुपर्ने आवश्यकता औँल्याउनुभयो।