'पुष्पा २' ले तोड्यो कमाइको रेकर्ड, बक्स अफिसमा ऐतिहासिक सफलता

एजेन्सी, मंसिर ३० गते । दक्षिण भारतीय सुपरस्टार अल्लू अर्जुन अभिनीत 'पुष्पा २' ले भारतीय फिल्म उद्योगमा नयाँ इतिहास रच्दै बक्स अफिसमा तहल्का मच्चाएको छ। फिल्मले भारतीय बक्स अफिसमा प्रत्येक दिन नयाँ रेकर्ड कायम गर्दै बलिउडको सबैभन्दा धेरै कमाइ गर्ने फिल्म 'जवान' को रेकर्डसमेत तोडेको छ। दोस्रो शनिबार ४६ करोड भारू कमाउँदै 'पुष्पा २' यस दिनको सबैभन्दा धेरै कमाइ गर्ने फिल्म बन्यो। हिन्दी संस्करणमा मात्र फिल्मले १० दिनमा ४९८ करोड भारू कमाएको छ भने भारतीय बजारमा कुल कमाइ ८२४ करोड भारू पुगेको छ। विश्वभरबाट भने फिल्मले १२०० करोड भारू कमाएर दर्शक र समीक्षक दुवैको मन जित्न सफल भएको छ।

सुकुमार बान्द्रेडीको लेखन र निर्देशनमा बनेको यस फिल्ममा अल्लू अर्जुनका साथ रश्मिका मन्दना, फरद फासिल, जगपति बाबु, धनुञ्जय, राव रमेश र सुनीलले शानदार अभिनय प्रस्तुत गरेका छन्। नवीन येर्नेनी र रविशंकर यममाञ्चिलीले निर्माण गरेको यो फिल्म एक्सन, क्राइम, र ड्रामा जनरामा आधारित छ। 'पुष्पा २' को रनटाइम ३ घण्टा २१ मिनेट रहेको छ, जसले दर्शकलाई फिल्मभरि बाँधिराख्न सफल भएको छ। फिल्मको यो सफलता भारतीय सिनेमा उद्योगलाई नयाँ उचाइमा पुर्‍याउने संकेत मानिएको छ।