धनुषामा जुवाको खालबाट ३९ जना पक्राउ, ९ लाख नगद बरामद

जनकपुरधाम, कार्तिक १९ गते । धनुषा प्रहरीले जुवाको खालबाट ९ लाख रुपैयाँ नगदसहित ३९ जनालाई पक्राउ गरेको छ। क्षिरेश्वरनाथ नगरपालिका-६, सखुवा बजारस्थित सार्वजनिक दलानमा जुवा खेलिरहेको अवस्थामा उनीहरूलाई नियन्त्रणमा लिइएको धनुषा प्रहरीका प्रवक्ता वरुणबहादुर सिंहले जानकारी दिनुभएको छ।

जिल्ला प्रहरी कार्यालय धनुषाबाट प्रहरी निरीक्षकको नेतृत्वमा खटिएको टोलीले विशेष अपरेशनका क्रममा ३९ जनालाई जुवा खेलिरहेको अवस्थामा रंगेहात पक्राउ गरेको हो। घटनास्थलबाट प्रहरीले दुई बुक तास, १०४ पिस तासका पत्ता, तीन थान फलावर प्रिन्ट भएका तास, २४ पिस कौडा, र विभिन्न आकारका ३६ थान मोबाइलसमेत बरामद गरेको छ। साथै, नगद नौ लाख त्रिहत्तर हजार आठ सय सत्तरी रुपैयाँ समेत बरामद गरिएको छ।

पक्राउ परेकाहरूलाई हाल जिल्ला प्रहरी कार्यालय धनुषाको हिरासतमा राखेर अनुसन्धान प्रक्रिया अघि बढाइएको धनुषा प्रहरी प्रवक्ता डिएसपी सिंहले बताए। घटनाबारे थप अनुसन्धान भइरहेको र जुवाको खाललाई निस्तेज गर्न प्रहरीको सक्रियता बढाइएको जनाइएको छ।