रौतहटमा अवैध भारतीय सामानसहित स्कर्पियो गाडी नियन्त्रणमा

जनकपुरधाम, कार्तिक ८ गते । प्रहरीले भारतबाट अवैध रूपमा सामान ल्याउँदै गरेको एक स्कर्पियो गाडी र ठूलो मात्रामा भारतीय सामान नियन्त्रणमा लिएको छ। जिल्ला प्रहरी कार्यालय रौतहटको गस्ती टोलीले बीआर ०१ एफ वाई ३२०९ नम्बरको स्कर्पियो गाडीलाई बुधबार नियन्त्रणमा लिएको हो।

गाडीमा १ लाख २२ हजार रुपैयाँ बराबरको भारतीय धान र केराउ बरामद भएको छ। जिल्ला प्रहरीका प्रवक्ता डिएसपी दीपक कुमार रायका अनुसार, बरामद सामग्री र गाडीको कुल मूल्य ३६ लाख २२ हजार रुपैयाँ रहेको छ, जुन अब जिल्ला भन्सार कार्यालय गौरमा आवश्यक कारबाहीका लागि बुझाइएको छ।  त्यस्तै, चन्द्रपुर नगरपालिका-८ बस्तीपुरमा प्रहरीले १ नाले बन्दुक पनि बरामद गरेको छ। इलाका प्रहरी कार्यालय चन्द्रनिगाहपुरको गस्ती टोलीलाई देखेर एक जना अपरिचित व्यक्तिले उक्त बन्दुक छोडेर भागेका थिए। अहिले प्रहरी त्यस व्यक्तिको खोजीमा जुटिरहेको छ।