'स्त्री २' ५०० करोड क्लबमा, 'बाहुबली २' को रेकर्ड तोड्यो

एजेन्सी,
मुम्बई, भदौ १८ गते ।बलिउड अभिनेत्री श्रद्धा कपूर र अभिनेता राजकुमार राव अभिनीत फिल्म 'स्त्री २' ५०० करोड क्लबमा प्रवेश गरेको छ। फिल्मले १८ औं दिनमा ४८ करोड ७ लाख कमाउँदै यो उपलब्धि हासिल गरेको हो। भारतीय सञ्चारमाध्यम दैनिक जागरणका अनुसार, 'स्त्री २' ले विश्वभरबाट १८ दिनमा ५९५ करोड कमाएको छ।

'स्त्री २' ले तेस्रो विकेन्डमा ५०० करोड क्लबमा समावेश हुने फिल्म 'बाहुबली २' को सात वर्ष पुरानो रेकर्ड तोड्न सफल भएको छ।

यस वर्षको घरेलु बक्सअफिसमा सर्वाधिक कमाइ गर्ने हिन्दी फिल्मको रुपमा 'स्त्री २' स्थापित भएको छ।

अमर कौशिकको निर्देशनमा बनेको यस फिल्ममा श्रद्धा र राजकुमारसँगै पंकज त्रिपाठी, अभिषेक बनेर्जी, अपारशक्ति खुराना लगायतका कलाकारको अभिनय छ।