श्रद्धा कपूरको 'स्त्री २' ले बक्सअफिसमा तोड्यो रेकर्ड, पहिलो दिनमै ५४ करोडको धमाकेदार ओपनिङ!

एजेन्सी,
मुम्बई, साउन ३२ गते । श्रद्धा कपूर अभिनीत बलिउड फिल्म 'स्त्री २' ले बक्सअफिसमा शानदार कमाई गर्दै दर्शकहरूलाई आकर्षित गरेको छ। यस फिल्मले पहिलो दिनमा ५४ करोड भारतीय रुपैयाँको ओपनिङ गर्दै अपेक्षाभन्दा धेरै राम्रो प्रदर्शन गरेको छ। 'स्त्री २' ले प्रारम्भिक रूपमा ४० करोडभन्दा माथि व्यापार गर्ने अनुमान गरिएको थियो। २०१८ को हिट फिल्म 'स्त्री'को यस दोस्रो श्रृंखलामा अपारशक्ति खुराना, अभिषेक बनर्जी र पंकज त्रिपाठीको पनि सशक्त भूमिका रहेको छ। बुधबारको विशेष प्रिमियरमा फिल्मले ८ करोड भारु आर्जन गरेको थियो भने ओपनिङको दिनमै ४६ करोडको व्यापार गर्दै ५४.३५ करोडको जम्मा ग्रस कलेक्सन गर्न सफल भएको छ।

यस कमाईसँगै 'स्त्री २' ले 'कल्की २८९८ एडी' र 'फाइटर' जस्ता पछिल्ला हिट फिल्महरूलाई उछिन्दै नयाँ रेकर्ड कायम गरेको छ। 'कल्की' ले भारतभर चारै भाषामा ९५ करोड रुपैयाँको व्यापार गरेको थियो भने 'फाइटर'ले २४.६० करोड रुपैयाँ आर्जन गरेको थियो। बिहीबार रिलिज भएका अक्षय कुमारको 'खेल मेल में' र जोन अब्राहमको 'वेदा'लाई पनि यस फिल्मले पछि पारेको छ। यो फिल्म २०१८ को चर्चित हरर कमेडी 'स्त्री' को सिक्वेल हो, जसले दर्शकलाई हँसाउन र डराउन सफल भएको थियो। 'स्त्री २' मा श्रद्धा कपूर र राजकुमार राव मुख्य भूमिकामा छन्, जबकि पंकज त्रिपाठी, अपारशक्ति खुराना र अभिषेक बनर्जी पनि आफ्नो पुराना भूमिकामा फर्किएका छन्। फिल्मको स्टार कास्ट, उनीहरूको कमिक टाइमिङ र अभिनयले ट्रेलरलाई झनै मनोरञ्जनात्मक बनाएको छ।