बिहारको बाबा सिद्धनाथ मन्दिरमा भागदौड: सातको मृत्यु, नौ घाइते

एजेन्सी ,

जेहनाबाद,साउन २८ गते ।  सोमबार बिहार राज्यको जेहनाबाद जिल्लास्थित मखदुमपुरको बाबा सिद्धनाथ मन्दिरमा भागदौड हुँदा सात जनाको मृत्यु भएको छ, र नौ जना घाइते भएका छन्।

यो दुःखद घटना मन्दिरमा भागदौड मच्चिएपछि भएको हो।

जेहनाबादका जिल्ला प्रशासक अलङ्कृता पाण्डेले मृतक र घाइतेहरूको पुष्टि गर्दै स्थिति नियन्त्रणमा रहेको बताए। यद्यपि, भागदौड कसरी सुरु भयो भन्नेबारे तत्काल जानकारी उपलब्ध नभएको उनको भनाइ छ।

प्रहरी प्रमुख दिवाकर कुमार विश्वकर्माले जिल्ला प्रशासक र प्रहरी उपरीक्षक घटनास्थलमा पुगेर स्थिति बुझिरहेको जानकारी दिए। शवलाई पोस्टमार्टमका लागि पठाइएको छ।

यसैबीच, प्रहरी अधिकारी विकास कुमारले घटना प्रति गहिरो दुःख व्यक्त गर्दै, पर्याप्त सुरक्षा व्यवस्था हुँदाहुँदै पनि यस्तो दुर्भाग्यपूर्ण घटना घटेको बताए। घटनाबारे अनुसन्धान जारी रहेको उनले जानकारी दिए।