युक्रेनी दूतावासको मेक्सिको सरकारलाई पुटिनलाई शपथग्रहण समारोहमा सहभागी भए पक्राउ गर्न अनुरोध

एजेन्सी
मेक्सिको सिटी,साउन २४ गते । मेक्सिकोस्थित युक्रेनी दूतावासले रूसी नेता भ्लादिमिर पुटिनलाई नवनिर्वाचित राष्ट्रपति क्लाउडिया शेनबामको शपथग्रहण समारोहमा सहभागी भए पक्राउ गर्न मेक्सिको सरकारलाई अनुरोध गरेको छ।

पुटिनलाई ‘युद्ध अपराध’ मा संलग्न रूसी नेताको रूपमा चिन्दै, किएभको प्रतिनिधिमण्डलले अक्टोबर १ को शपथग्रहण समारोहमा युक्रेनी राष्ट्रपति भोलोदिमिर जेलेन्स्कीलाई निमन्त्रणा गरेकोमा मेक्सिकोलाई धन्यवाद दिएको छ। युक्रेनी दूतावासले जारी गरेको विज्ञप्तिमा भनिएको छ, “हामी विश्वास गर्छौं कि मेक्सिको सरकार अन्तर्राष्ट्रिय पक्राउ पुर्जीको पालन गर्नेछ र पुटिनलाई हेगस्थित संयुक्त राष्ट्रसङ्घको न्यायिक निकायलाई हस्तान्तरण गर्नेछ।” मार्च २०२३ मा, अन्तर्राष्ट्रिय फौजदारी अदालत (आईसीसी) ले सन् २०२२ को प्रारम्भमा मस्कोको आक्रमण पछि युक्रेनी बालबालिकालाई जबर्जस्ती रुसमा निर्वासित गरेको विषयमा पुटिनविरुद्ध युद्ध अपराधको आरोपमा पक्राउ पुर्जी जारी गरेको थियो।

शेनबामका विदेशमन्त्री जुआन रामोन डे ला फुएन्टेले मेक्सिकोसँग कूटनीतिक सम्बन्ध भएका हरेक देशका नेतालाई उद्घाटन समारोहमा आमन्त्रण गर्नु ‘मानक प्रोटोकल’ भएको बताएका छन्। मेक्सिकोको पहिलो महिला राष्ट्रपति बन्न लागेकी शेनबामले गत जुन २ मा भएको आम निर्वाचनमा ऐतिहासिक जित हासिल गरिन्। उहाँलाई बधाई दिने विश्वका नेताहरूको सूचीमा पुटिन र जेलेन्स्की पनि रहेका छन्।