अरवलमा अनौठो प्रेमकथा: जेठी दिदीसँग तय विवाह, कान्छी सालीसँग मन्दिरमै सात फेरा

एजेन्सी, पुष २० गते । बिहारको अरवल जिल्लाबाट पारिवारिक सम्बन्ध र प्रेमको अनपेक्षित मोड लिने रोचक घटना सार्वजनिक भएको छ। जेठी दिदीसँग विवाह तय भइसकेका एक युवकले अन्ततः कान्छी सालीसँग प्रेम विवाह गरेका छन्। दुबै परिवारले अप्रिलमा विवाह गर्ने मिति तय गरिसकेका बेला भएको यो घटनाले स्थानीय क्षेत्रमा ठूलो चर्चा पाएको छ।

कुर्था थाना क्षेत्रको भतूबिगहा निवासी आदित्य कुमारको विवाह सबलकसरायकी एक युवतीसँग तय भएको थियो। करिब तीन महिना अघि दुबै परिवारले धूमधामका साथ इन्गेजमेन्टसमेत गरिसकेका थिए। विवाहको तयारी चलिरहेकै बेला आदित्यको मोबाइलमार्फत हुने कुराकानी उनकी हुने पत्नीकी कान्छी बहिनीसँग बढ्दै गयो। जहानाबादमा बस्दै पढाइ गरिरहेकी ती युवतीसँगको संवाद क्रमशः गहिरो प्रेममा परिणत भयो।

समाज र लोकलाजको परवाह नगरी दुबै जनाले भागेर विवाह गर्ने निर्णय गरे। शनिबार प्रेमी जोडी कुर्था थानामा पुगेपछि प्रहरीको पहलमा उनीहरूलाई स्थानीय प्राचीन सूर्य मन्दिर पठाइएको थियो। त्यहाँ पण्डित सतीश पाण्डेयले वैदिक विधि र मन्त्र उच्चारणका साथ दुबैको विवाह सम्पन्न गराए। खरमास महिनामै भएको यस विवाहलाई हेर्न मन्दिर परिसरमा सयौँ स्थानीयको भीड लागेको थियो।

यस घटनाले दुबै परिवारलाई स्तब्ध बनाएको छ। विवाहका क्रममा युवक–युवतीकी आमाहरू आँसुमा डुबेका देखिन्थे र निर्णयप्रति असन्तुष्ट थिए। यद्यपि, मन्दिरमा सम्पन्न भएको विवाहलाई अस्वीकार गर्न नसक्ने अवस्थामा परिवार पुगेका छन्। अनौठो ‘साली–जिजा’ विवाहको चर्चा अहिले अरवल र आसपासका क्षेत्रमा चर्को बनेको छ।