एमडिएमका चामल र मसला खाएर गुरुजी फसे, प्रधानाध्यापकसँग ४ लाख २१ हजार असुलीने

एजेन्सी, श्रावण ७ गते ।  बिहारका सरकारी विद्यालयहरूमा सञ्चालित मध्याह्न भोजन (एमडिएम) योजनामा अनियमितता र घोटाला लगातार सार्वजनिक भइरहेका छन्। पछिल्लो घटना सीतामढीको बैरगनिया प्रखण्डस्थित बनवारी मध्य विद्यालयमा देखिएको छ, जहाँका प्रधानाध्यापकले ४ लाख २१ हजार रुपैयाँ बराबरको एमडिएमको चामल र मसला गबन गरेको ठहर गर्दै आर्थिक जरिवाना तिराउन आदेश दिइएको छ। नोडल अधिकृतको निरीक्षणपछि विभिन्न अनियमितता भेटिएपछि एमडिएम डीपीओले प्रधानाध्यापकलाई खातामा पैसा फिर्ता गर्न वा तलबबाट कटौती हुने चेतावनी दिएका छन्।

यसअघि बाजपट्टी र परिहार प्रखण्डका विद्यालयहरूमा पनि यस्तै घोटाला सार्वजनिक भइसकेका छन्। कतिले ३० क्विन्टल चामल गायब पारे भने, कतिले विद्यार्थीको फर्जी उपस्थिति देखाएर लाखौं रुपैयाँ गबन गरेका छन्। स्थानीयबासी र सम्बन्धित निकायको अनुगमनबाट बारम्बार यस्ता घटना फेला परे पनि विद्यालयस्तरमा एमडिएममा लुटपाट रोकिएको छैन। बालबालिकाको पोषणको लागि ल्याइएको योजनामा भएको भ्रष्टाचारले शिक्षा क्षेत्रमै गम्भीर प्रश्न उठाएको छ।