BITS पिलानीका दुई विद्यार्थीले बनाए बम बोक्ने ‘कामिकेज ड्रोन’, भारतीय सेनाले खरिद गर्‍यो

एजेन्सी, श्रावण ६ गते । भारतको हैदराबादबाट दुई २० वर्षे इन्जिनियरिङ विद्यार्थीले देशकै रक्षा क्षेत्रमा उल्लेखनीय योगदान दिएका छन्। BITS पिलानीका जयन्त खत्री र शौर्य चौधरीले आफ्नो होस्टेलको कोठामै अत्याधुनिक ‘कामिकेज ड्रोन’ निर्माण गरेका हुन्, जुन बम बोकेर लक्षित स्थानमा प्रहार गर्न सक्षम छ। उल्लेखनीय कुरा के छ भने, उनीहरूको ड्रोनले भारतीय सेनाको ध्यान खिच्न सफल भयो र सेनाले यसलाई खरिदसमेत गरिसकेको छ।

अपोलियन डायनेमिक्स नामक स्टार्टअप खोलेका यी विद्यार्थीले जम्मु, चंडीमन्दिर, पानागढ र अरुणाचलका विभिन्न सैन्य युनिटका लागि यूएभी/ड्रोनहरू बनाएका छन्। करिब ३०० किमी प्रतिघण्टाको गतिमा उड्न सक्ने र १ किलोग्राम पेलोड लक्षमा ठ्याक्कै गिराउन सक्ने यी ड्रोनहरू सामान्य व्यावसायिक ड्रोनको तुलनामा पाँच गुना छिटा छन्। अझ रोचक त के छ भने, यी ड्रोनहरू रडारमा समेत नपर्ने गरी डिजाइन गरिएका छन्। भारतले आयातमा निर्भरता घटाउने उद्देश्यका साथ सुरु गरिएको यो प्रयास अब रक्षा क्षेत्रमा एक क्रान्तिकारी मोड बन्न सक्ने देखिन्छ।