सीतामढ़ीमा कोचिङ्ग सञ्चालकद्वारा नाबालिग छात्रामाथि दुष्कर्म प्रयास, स्थानीय आक्रोशित

एजेन्सी, जेठ २१ गते । बिहारको सीतामढ़ी जिल्लामा फेरि एक पटक शैक्षिक संस्थामा भएको आपराधिक घटनाले सबैलाई स्तब्ध बनाएको छ। गीतेश नामक चर्चित गीतकारले विद्यालयमा संस्कारयुक्त शिक्षकहरूको आवश्यकता रहेको कुरा बारम्बार दोहोर्‍याउँदै आएका छन्, जुन अहिलेको घटनामा झन् सान्दर्भिक देखिएको छ। पछिल्लो समयमा स्कूल तथा कोचिङ्ग केन्द्रहरूमा शिक्षकहरूद्वारा आपत्तिजनक गतिविधिहरू बढ्दै गएको छ, जसमा केही शिक्षकहरू मादक पदार्थ सेवन गर्दै पाइएको र तिनीहरूलाई निलम्बन गरिएको समाचार आएको थियो।

ताजा घटनामा, गाढा थाना क्षेत्रको मानिकचौक गाउँमा रहेको एक कोचिङ्ग सेन्टरका सञ्चालक शिवचन्द्र पण्डितमाथि आफ्नै कोचिङ्गकी नाबालिग छात्रामाथि दुष्कर्म प्रयास गरेको आरोप लागेको छ। पीडित छात्रालाई कोचिङ्गमा बोलाई कोठामा बन्द गरेर यस्तो आपराधिक प्रयास गरिएको बताइएको छ। छात्राले प्रतिरोध गरेपछि भाग्न सफल भएकी थिइन्। शिवचन्द्र पण्डित स्थानीय जनप्रतिनिधि मुनिता देवीका पति तथा जन सुराज पार्टीका सक्रिय सदस्यसमेत हुन्।

छात्राले घर पुगेर आमालाई घटना सुनाएपछि पीडितका परिवारजन आक्रोशित हुँदै कोचिङ्ग सेन्टरमा पुगे र सञ्चालकलाई नियन्त्रणमा लिएर पिटाइसमेत गरे। घटनाको जानकारी पाएपछि प्रहरी पुगेको र आरोपीलाई हिरासतमा लिइसकेको छ। स्थानीय बासिन्दाहरूले कडा कारबाहीको माग गरेका छन् भने प्रहरी प्रशासनले मुद्दा दर्ता गरी थप अनुसन्धान अघि बढाएको जनाएको छ।