सिक्किममा भारी वर्षा पछि विनाश: ल्यान्डस्लाइडले घर बगायो, सेना सहित थुप्रै बेपत्ता

एजेन्सी, जेठ १९ गते । सिक्किममा लगातारको भारी वर्षा पछि जनजीवन अस्तव्यस्त बनेको छ। विशेषगरी उत्तर सिक्किमका अधिकांश क्षेत्रहरूमा ठूलो विनाश भएको छ। आइतवार राति ठूलो भूस्खलन (ल्यान्डस्लाइड) भएपछि कयौं घरहरू मलबामुनि पुरिएका छन्। उद्धार कार्य जारी छ र मानिसहरूलाई खोज्ने काम तीव्र गतिमा भइरहेको छ। प्रारम्भिक रिपोर्ट अनुसार, मलबामुनि परेका मानिसहरूमा केही भारतीय सेनाका जवान पनि हुनसक्ने आशंका गरिएको छ। हालसम्म धेरै मानिस अझै बेपत्ता छन् भने शवको पहिचान गर्ने र उद्धार गर्ने काम जारी छ।

भारत मौसम विज्ञान विभाग (IMD) ले मंगन जिल्ला लागि रेड अलर्ट जारी गरेको छ। विभागले अत्यधिकदेखि अति भारी वर्षाको चेतावनी दिएको छ। आगामी २४ घण्टाका लागि ग्यालशिंग, नामची, सोरेंग, गंगटोक र पाकयोंग जिल्लामा पनि अरेन्ज अलर्ट जारी गरिएको छ।

वर्षाको कारण सिक्किमको तीस्ता नदीको जलस्तर उच्च भएको छ। शुक्रबार मंगन जिल्लाको चुबोम्बु नजिक ११ यात्रु बोकेको एक पर्यटक सवारी तीस्ता नदीमा १,००० फिट तल खसेको थियो। त्यस रात दुई यात्रुलाई जिवितै उद्धार गरिए पनि बाँकी ९ जना, जसमा चालक पनि समावेश छन्, हालसम्म बेपत्ता छन्। सरकार र उद्धार टोली घटनास्थलमा परिचालित छन् र खोजी कार्य जारी रहेको छ।