रौतहटमा कारले मोटरसाइकललाई ठक्कर दिँदा बाबु–छोरीको मृत्यु

जनकपुरधाम, वैशाख २१ गते । रौतहटको चन्द्रपुर नगरपालिका–४ मा पूर्व पश्चिम लोकमार्गमा कारले मोटरसाइकललाई ठक्कर दिँदा बाबु र छोरीको मृत्यु भएको छ। दुर्घटनामा गरुडा नगरपालिका–३ मलाहिटोलका ६० वर्षीय बलिराम सहनी र उनकी ४० वर्षीया छोरी उर्मिला देवी सहनीको ज्यान गएको हो। हेटौँडाबाट चन्द्रपुरतर्फ आउँदै गरेको बा ६ च ३५२६ नम्बरको कारले निजगढतर्फ जाँदै गरेको ना ३ प ९५१२ नम्बरको मोटरसाइकललाई बिहान सवा ६ बजे ठक्कर दिएको थियो।

प्रहरीका अनुसार सहनीको दाहिने खुट्टा, ढाड र अण्डकोषमा गम्भीर चोट लागेको थियो भने उर्मिला देवीको दाहिने हात र ढाडमा चोट लागेको थियो। दुबैको स्थानीय अस्पतालमा उपचारको क्रममा मृत्यु भएको हो। कार चालक हेटौँडा उपमहानगरपालिका–१२ का ४३ वर्षीय कुमार पोख्रेललाई इलाका प्रहरी कार्यालय चन्द्रनिगाहपुरले नियन्त्रणमा लिएको छ।