धनुषाका तीन उद्योगका बैंक खाता र सम्पत्ति श्रम अदालतको आदेशअनुसार रोक्का

जनकपुरधाम, वैशाख १९ गते ।  धनुषाका तीन उद्योग—महेन्द्रनगरस्थित एभरेष्ट पेपर मिल्स प्रालि, जानकी मेडिकल कलेज र बुद्ध प्रारंगिक मल उद्योग—का बैंक खाता र चलअचल सम्पत्ति रोक्का गरिएको छ। श्रमिक तथा कर्मचारीका तलब भत्ता र सेवा सुविधाको बक्यौता नतिरेको, साथै श्रम अदालतको आदेश उल्लंघन गरेको भन्दै श्रम तथा रोजगार कार्यालय जनकपुरधामले यो कदम चालेको हो। कार्यालयका अनुसार अदालतका आदेश कार्यान्वयनका लागि खाता तथा सम्पत्ति रोक्का गरिएको हो र बक्यौता फर्छ्यौट नभएसम्म ती खाता सञ्चालनमा नआउनेछन्।

तीनै उद्योगमध्ये एभरेष्ट पेपर मिल्स दुई वर्षदेखि बन्द छ भने जानकी मेडिकल कलेज र बुद्ध प्रारंगिक मल उद्योग हाल पनि सञ्चालनमै छन्। ती उद्योगहरूले करिब २५० श्रमिकको जम्मा १० करोड रुपैयाँ बराबरको बक्यौता तलब तथा सेवा सुविधा बाँकी राखेका छन्। चालु आर्थिक वर्षमा जनकपुरधाम कार्यालयमा ४६ वटा श्रम उजुरी दर्ता भएका छन्, जसमा १५ वटा उजुरी एभरेष्ट पेपर मिल्ससम्बन्धी छन्। कार्यालयले हालसम्म ११२ वटा उद्योग तथा प्रतिष्ठानमा श्रम ऐनको कार्यान्वयन अनुगमनसहित बाल श्रम र श्रम अडिटसम्बन्धी निरीक्षण पनि गरेको छ। यसै आर्थिक वर्षमा ३० हजार ६२ जनाले वैदेशिक रोजगारीका लागि श्रम स्वीकृति प्राप्त गरेका छन्।