"गौशालामा मालपोत–नापी कार्यालयको स्थापनासँगै रोजगारी र व्यवसायमा नयाँ क्रान्ति"

जनकपुरधाम, वैशाख ७ गते । महोत्तरीको गौशाला बजारमा मालपोत र नापी कार्यालय स्थापनापछि स्थानीय जनताले घरदैलोमै सरकारी सेवा प्राप्त गर्न थालेका छन्, साथसाथै रोजगारी र व्यवसायिक अवसरमा उल्लेखनीय वृद्धि भएको छ। करिब दुई लाख जनसंख्या रहेका साबिकका २० गाविसका बासिन्दाले आफ्नो क्षेत्रमै जग्गा कारोबार, दाखिल खारेज, नामसारी, पास, रोक्का र फुकुवाजस्ता सेवा लिन पाएका छन्। यसले गर्दा स्थानीय तहमा लेखापढी र भूसेवा केन्द्र खोल्ने युवा व्यवसायीहरूको संख्या उल्लेख्य रूपमा बढेको छ। रेडियो पत्रकारिता छाडेर लेखापढी व्यवसाय सुरु गरेका नागेन्द्र साहदेखि लिएर व्यवसायिक तरकारी खेती तथा जग्गा कारोबार छोडेका विन्देश्वर महतो, जयकुमार यादव र रमेश महतोजस्ता थुप्रै युवाले भूसेवा व्यवसायलाई नयाँ रोजगारीको माध्यम बनाएका छन्।

लेखापढी व्यवसायी महासंघ गौशालाका अध्यक्ष सत्यनारायण यादवका अनुसार, नौ महिनाको अवधिमा ३३ वटा भूसेवा केन्द्र दर्ता भई एक सयभन्दा बढीले प्रत्यक्ष रोजगारी पाएका छन्, भने अन्य ५० जना युवाले स्वतन्त्र रूपमा लेखापढी सेवा दिँदै जीविकोपार्जन गरिरहेका छन्। मालपोत कार्यालय प्रमुख दीपेन्द्र झाका अनुसार, दैनिक २०–२५ वटा जग्गा पास र ३०–३५ वटा रोक्का तथा फुकुवा काम हुने गरेको छ, जहाँ तीन सयभन्दा बढी सेवाग्राहीको उपस्थिति देखिन्छ। यो चाप जिल्लाकै पुरानो जलेश्वर मालपोत कार्यालयभन्दा बढी हो। २०७८ चैत २० मा उद्घाटन भएको भए पनि आवश्यक स्रेस्ता नआउँदा सेवा सुरु गर्न ढिलाइ भएको थियो, जुन बाधा पार गर्दै अब यहाँको सेवा प्रभावकारी रूपमा अघि बढिरहेको छ।