दिल्लीमा सेक्स र्‍याकेट भण्डाफोर, २३ महिला उद्धार, ७ जना पक्राउ

एजेन्सी, चैत ११ गते । दिल्ली प्रहरीले पहारगन्ज क्षेत्रमा सञ्चालन भइरहेको एक ठूलो सेक्स र्‍याकेट भण्डाफोर गर्दै २३ जना महिलाको उद्धार गरेको छ। उद्धार गरिएकामध्ये ३ जना नाबालिग र १० जना नेपाली नागरिक रहेको प्रेस ट्रस्ट अफ इन्डियाले जनाएको छ। मानव तस्करीमा संलग्न रहेको आरोपमा प्रहरीले ७ जनालाई पक्राउ गरेको छ, जसमा नुरसेद आलम, मोहम्मद राहुल आलम, अब्दुल मनान, तौसिफ रेक्सा, समिम आलम, मोहम्मद जरुल र मोनिष रहेका छन्।

प्रहरीको संयुक्त टोलीले पहारगन्ज, सारदानन्द मार्ग र हिम्मतगढ क्षेत्रमा अपरेशन सञ्चालन गरेको थियो। अनुसन्धानका क्रममा आरोपीहरूले नेपाल, पश्चिम बंगाल र भारतका अन्य राज्यहरूबाट महिलाहरूलाई प्रलोभनमा पारेर ल्याउने र जबरजस्ती देहव्यापारमा लगाउने गरेको खुलासा भएको छ। प्रहरीले छापा मार्नुअघि सो क्षेत्रमा रेकी गरी नक्कली ग्राहकको रूपमा प्रहरीलाई पठाएको थियो। पक्राउ परेका अभियुक्तहरूमाथि थप अनुसन्धान भइरहेको प्रहरीले जनाएको छ।