दुई छोरीको विष सेवनबाट मृत्यु, बेपत्ता आमा पक्राउ

विराटनगर, भदौ १९ गते । मोरङको सुन्दरहरैंचामा दुई छोरीलाई विष खुवाएर बेपत्ता भएकी आशंका गरिएकी अस्मिता कार्कीलाई प्रहरीले पक्राउ गरेको छ। १ वर्षीया आईका र ३ वर्षीया अर्पणाकी आमा अस्मितालाई झापाको बिर्तामोडस्थित सडकमा अस्वस्थ अवस्थामा फेला पारिएको थियो। उनलाई विराटनगरको कोशी अस्पतालमा उपचारका लागि भर्ना गरिएको छ। मोरङ प्रहरीले अस्मितालाई पक्राउ गरेर छानबिन सुरु गरेको छ। अस्मिताले गत शुक्रबार दुई छोरीलाई सँगै लिएर हिँडेकी थिइन्, तर दुवै छोरीको शव केरा बारीमा शनिबार फेला परेको थियो।

प्रहरीका अनुसार, अस्मिता कार्कीले आफ्ना दुई छोरीलाई विष खुवाएर हत्या गरेको निष्कर्ष निकालेको छ। अस्मिताले पति अर्जुन कार्कीलाई 'तेरा छोरी मारिदिएँ, म पनि मर्छु' भन्ने सन्देश मोबाइलमा पठाएको दाबी गरिएको छ। तर, उक्त सन्देश अस्मिताले नै पठाएको हो भन्ने विषयमा प्रहरीले यकिन गर्न बाँकी रहेको जनाएको छ। बालिकाहरूको शव कीटनाशक औषधिको छेउमा फेला परेको थियो, जहाँ दिदीले बहिनीलाई अँगालो हालेको अवस्थामा शव भेटिएको थियो।