दुर्गेश थापा दोस्रो सन्तानका पिता बने: छोराको पास्नीमा सार्वजनिक गरे खुसी

काठमाडौं, माघ १५ गते ।  चर्चित गायक तथा स्टेज पर्फमर दुर्गेश थापा दोस्रो सन्तानका पिता बनेका छन्। उनकी पत्नी प्राची लामाले पाँच/छ महिनाअघि दोस्रो छोरालाई जन्म दिएकी थिइन्, तर दुर्गेशले यो खुसीलाई ढिलो गरी सार्वजनिक गरेका हुन्। यसै साता छोराको अन्नप्राशन (पास्नी) को अवसर पारेर उनले सामाजिक सञ्जालमार्फत दोस्रो सन्तानको जानकारी दिँदै खुसी साटेका छन्।

बिहीबार छोरासँगको भिडियो पोस्ट गर्दै दुर्गेशले लेखेका छन्, 'आज मेरो जीवनको अर्को सुन्दर अध्याय सार्वजनिक गर्दै छु। मेरो दोस्रो छोरा— नाम मात्र होइन, मेरो पहिचानको निरन्तरता।' उनले पहिलो छोराको नाम दक्षित थापा र दोस्रो छोराको नाम देवांश थापा रहेको पनि खुलाएका छन्। दुर्गेशले यसअघि आफ्नो विवाहको खबर पनि ढिलो गरी सार्वजनिक गरेका थिए, जसले उनको निजी जीवनलाई गोप्य राख्ने शैलीलाई झल्काउँछ।

'दुश्मन हेरेको हेर्‍यै' जस्ता हिट गीतका कारण स्टेज कार्यक्रममा निकै माग भएका दुर्गेश थापा अहिले पनि लोकप्रियताको शिखरमा छन्। दोस्रो सन्तानको आगमनले उनको पारिवारिक जीवनमा नयाँ खुसी थपेको छ, जसलाई फ्यानहरूले पनि सामाजिक सञ्जालमा बधाई दिइरहेका छन्।