मनिषा कोइरालाले नेपाली चलचित्रमा पुनः काम गर्ने इच्छा व्यक्त

काठमाडौं, चैत ११ गते । बलिउडमा आफ्नो पहिचान बनाइसकेपछि अभिनेत्री मनिषा कोइराला पुनः नेपाली चलचित्रमा काम गर्न इच्छुक रहेको बताएकी छिन्। नेपाल चलचित्र तथा सांस्कृतिक प्रतिष्ठानद्वारा आयोजित ‘नेपाल अन्तर्राष्ट्रिय चलचित्र महोत्सव (निफ)’ को आठौं संस्करणमा ‘सिनेमा संवाद’ कार्यक्रममा बोल्दै उनले नेपाली लेखक तथा निर्देशकहरूले नयाँ र भिन्न विषय लिएर प्रस्ताव गर्न सक्ने उल्लेख गरिन्। चलचित्र ‘फेरी भेटौँला’ हुँदै बलिउड प्रवेश गरेकी कोइरालाले ‘धर्मा’ जस्ता नेपाली चलचित्रमा अभिनय गरेकी थिइन्। क्यान्सर जितेपछि आफ्नो जीवनशैली र बुझाइमा परिवर्तन आएको बताउने उनले सुरुआती दिनमै नेपाली चलचित्रकर्मीलाई आफ्नै कथा भन्न आग्रह गरेको स्मरण गरिन्।

कोइरालाले पछिल्लो समय नेपाली चलचित्रमा आएको कलात्मक र व्यावसायिक उन्नतिलाई सकारात्मक संकेत मान्दै नेपाली सिनेमाले अन्तर्राष्ट्रिय स्तरमा स्थान बनाएको बताइन्। हालै भारतीय वेब शृंखला ‘हिरामण्डी’ मा अभिनय गरेर चर्चा कमाएकी उनले निर्देशक सञ्जयलीला भन्सालीसँग २८ वर्षपछि पुनः सहकार्य गरेको अनुभव साझा गरिन्। भूमिका जीवन्त बनाउन उर्दु भाषा विज्ञसँग प्रशिक्षण लिएको बताउँदै उनले सशक्त अभिनयका कारण चरित्र लोकप्रिय भएको धारणा राखिन्। साथै, उनले राजनीति र चलचित्र निर्माणमा आउन अनिच्छा व्यक्त गर्दै हाल एक पुस्तक लेखनमा संलग्न रहेको जानकारी दिइन्।