कृति सेनन र कबिर बहियाको प्रेम चर्चा चुलिँदै

एजेन्सी

मुम्बई, पुस १८ गते । बलिउड अभिनेत्री कृति सेनन र व्यवसायी कबिर बहियाको प्रेम सम्बन्धबारे चर्चा चुलिँदो छ। दुवैलाई पटक-पटक सँगै देखिएको छ भने क्रिसमसलगायत विभिन्न अवसरमा सँगै समय बिताएको खबरले हल्ला थप चर्काएको छ। हालै राहत फतेह अली खानको कन्सर्टमा कृति र कबिर सँगै देखिए, जहाँ अभिनेत्रीकी बहिनी नुपुर सेननले इन्स्टाग्राममार्फत कन्सर्टका झलकहरू सेयर गरेकी थिइन्।

कृति सेनन नयाँ वर्ष मनाउन दुबई गएकी छिन्, जहाँ उनकी बहिनी नुपुर सेनन र कथित प्रेमी कबिर बहिया पनि उनको साथमा छन्। दुबई यात्रामा कन्सर्टका साथै अभिनेत्रीलाई महेन्द्र सिंह धोनी, वरुण शर्मा, र गायक स्टेबिन बेनसँग देखिएको थियो। धोनीले राहत फतेह अली खानसँग खिचाएका तस्बिरहरू सामाजिक सञ्जालमा भाइरल भएका छन्।

कबिर र कृतिलाई ग्रीस भ्रमणदेखि सामाजिक जमघट र कबिरको पारिवारिक कार्यक्रममा समेत सँगै देखिएको छ। यद्यपि, दुवैले आफ्नो सम्बन्धबारे कुनै आधिकारिक प्रतिक्रिया दिएका छैनन्। कामको कुरा गर्दा, कृतिले सन् २०२४ मा "तेरी बातों में ऐसा उल्झा जिया," "क्रु," र "दो पट्टी" जस्ता ठूला परियोजनामा अभिनय तथा निर्माण गरेर आफ्नो करियरलाई थप उचाइमा पुर्‍याएकी छिन्।