‘भुल भुलैया ३’ नेपालमा प्रदर्शनका लागि तयार

काठमाडौं, कार्तिक १६ गते । कार्तिक आर्यन अभिनीत बलिउड फिल्म भुल भुलैया ३ नेपालमा शुक्रबारदेखि प्रदर्शनमा आउने भएको छ। बिहीबार दिउँसोसम्म सेन्सर प्रक्रिया बाँकी रहँदा यसको प्रदर्शनबारे अन्योलता थियो। तर, अन्ततः केन्द्रीय चलचित्र जाँच समितिले बिहीबार बेलुका फिल्मलाई नेपालभर प्रदर्शन गर्न स्वीकृति दिएको छ।

सेन्सर बोर्डले फिल्मलाई पिजी (१६ वर्षमुनिका दर्शकका लागि अभिभावकका साथमा) सर्टिफिकेट प्रदान गरेको छ। हरर-कमेडी जनराको यो फिल्ममा कार्तिक आर्यनसँगै माधुरी दीक्षित र तृप्ति डिमरीले मुख्य भूमिका निभाएका छन्, भने निर्देशन अनीस बाज्मीले गरेका हुन्।

भुल भुलैया ३ का अतिरिक्त रोहित शेट्टीको अर्को बहुप्रतीक्षित फिल्म सिंघम अगेन पनि शुक्रबारदेखि नेपालमा प्रदर्शनमा आउने तयारीमा छ। सिंघम अगेन भने यसअघि नै सेन्सर प्रक्रिया पूरा गरी प्रदर्शन अनुमति प्राप्त गरिसकेको छ।