‘छक्कापञ्जा ५’ को बक्स अफिसमा दमदार कमाई, ८ करोड नाघ्यो

काठमाडौं, असोज २९ गते ।  फिल्म ‘छक्कापञ्जा ५’ ले घरेलु बक्स अफिसमा उल्लेखनीय सफलता हात पारेको छ। प्रदर्शनीको पहिलो दिनदेखि नै राम्रो कमाई गर्दै आएको यस फिल्मले सोमबारसम्म ८ करोडभन्दा बढीको व्यवसाय गरेको वितरक मनोज राठीले जानकारी दिएका छन्। राठीका अनुसार फिल्मको कमाई अपेक्षा भन्दा राम्रो भएको छ र यसले सुरुको दिनबाटै उत्कृष्ट व्यापार गरिरहेको छ।

मल्टिप्लेक्स र मोफसलमा सशक्त उपस्थिति
‘छक्कापञ्जा ५’ ले प्रतिस्पर्धी फिल्महरूको तुलनामा पहिलो दिन नै दोब्बर शोलाई आकर्षित गरेको थियो। फिल्मले प्राप्त शोहरूलाई उच्च अकुपेन्सीमा परिणत गर्दै काठमाडौँ उपत्यका मात्र होइन, मोफसलमा पनि उल्लेख्य व्यापार गरेको छ। विदेशमा पनि यस फिल्मले राम्रो प्रदर्शन गर्दै अस्ट्रेलिया र अमेरिकामा पनि राम्रो आम्दानी गरेको निर्माण पक्षले दाबी गरेको छ।
दीपाश्री निरौलाले निर्देशन गरेको यस फिल्ममा दीपकराज गिरी, केदार घिमिरे, वर्षा शिवाकोटी, मेक्सम गौडेल, राजाराम पौडेल, र रमेश बुढाथोकी लगायतका कलाकारहरूको उत्कृष्ट अभिनय देख्न सकिन्छ।