रश्मिका मन्दाना सलमानको अपोजिटमा 'सिकन्दर' मा, सत्यराजको एक्सन दृश्यले थप्यो आकर्षण

एजेन्सी
मुम्बई, भदौ ४ । सलमान खानको मुख्य भूमिका रहेको बलिउड फिल्म 'सिकन्दर' अहिले चर्चामा छ, जसले फ्यानहरूको उत्साहलाई उच्च बनाइरहेको छ। एआर मुरुगादासको निर्देशनमा बनेको यो एक्सन थ्रिलर फिल्ममा सलमानले डबल रोलमा अभिनय गर्ने खबर छ, जहाँ उनी एक समाजसेवी व्यापारीको भूमिका निभाइरहेका छन्। साथै, उनले फिल्ममा 'दबंग' शैलीको भूमिकामा पनि देखा पर्नेछन्।

रिपोर्टअनुसार, अगस्ट २२ बाट सुरु हुने एक्सन सिक्वेन्सको लागि करिब १० हजार पेस्तोल र गोलीको अर्डर गरिएको छ। यो सिक्वेन्सलाई थ्रिलले भरिपूर्ण बनाउन ४० दिनको समय तालिकामा छायांकन गरिनेछ। फिल्म निर्माताहरूले उच्च ओक्टेन एक्सन दृश्यहरू मार्फत दर्शकहरूलाई आकर्षित गर्ने योजना बनाएका छन्। यस फिल्ममा सलमान खानले व्यक्तिगत चार्टर्ड प्लेनमा भिलेनका छोरासँग भिडन्तको दृश्य खिचेका छन्, जसमा 'बाहुबली' स्टार सत्यराजले एक्सन दृश्यमा थप आकर्षण दिएका छन्। नाडियाडवाला ग्रान्डसन इन्टरटेनमेन्टले निर्माण गरेको यस फिल्ममा सलमानको अपोजिटमा रश्मिका मन्दाना देखिनेछिन्। 'सिकन्दर' फिल्म सन् २०२५ को इदमा प्रदर्शन हुने अपेक्षा गरिएको छ।