३४ टन प्याज तस्करी प्रकरण: तीन जनाविरुद्ध मुद्दा दायर, ३६ लाख बिगो माग

जनकपुरधाम, चैत २१ गते । वीरगञ्जस्थित पथलैया राजस्व अनुसन्धान कार्यालयले ३४ टन प्याज चोरी पैठारी गरेको आरोपमा तीन जनाविरुद्ध उच्च अदालत जनकपुरमा मुद्दा दायर गरेको छ। अनुसन्धान अधिकृत हरिप्रसाद शर्माका अनुसार, शिव पार्वती ट्रेडर्सकी सञ्चालक जनकदुलारी देवी, भारतीय १६ चक्के ट्रकका चालक उमेश यादव र ट्रकका धनी भारतीय नागरिक नरेश यादवविरुद्ध राजस्व छली अभियोगमा कानुनी कारबाही अघि बढाइएको छ। अभियुक्तहरूले भन्सार जाँचपास नगराई चोरी पैठारी गरी राजस्व चुहावट (अनुसन्धान तथा नियन्त्रण) ऐन, २०५२ को दफा ३ विपरीत अपराध गरेको कार्यालयको दाबी छ।

अनुसन्धान कार्यालयले उक्त मुद्दामा बिगो र जरिवानासहित रु ३६ लाख ५८ हजार १०० क्षतिपूर्ति माग दाबी गरेको छ। साथै, ट्रक धनी नरेश यादवलाई प्रतिवादी कायम गर्दै १६ चक्के लरी जफत प्रक्रिया अघि बढाइएको छ। चालु आर्थिक वर्षमा मात्रै अनुसन्धान कार्यालयले राजस्व चुहावटसम्बन्धी १२ वटा मुद्दा दर्ता गरिसकेको छ, जसअन्तर्गत यो प्रकरण ठूलो मानिएको छ।