मिथिलाञ्चलमा चैती छठ पर्वको दोस्रो दिन खरना पर्व भव्य रूपमा मनाइँदै

जनकपुरधाम, चैत २० गते ।  मिथिलाञ्चलमा धार्मिक श्रद्धा र भक्ति भावका साथ मनाइने चारदिने चैती छठ पर्व अन्तर्गत दोस्रो दिन बुधबार खरना पर्व धूमधामसँग मनाइँदै छ। पहिलो दिन नहाय-खाय विधिपूर्वक सम्पन्न गरेपछि आजको दिन सूर्य उपासनाका लागि विशेष महत्त्व राख्ने खरना पर्वमा व्रतालुहरू दिनभरि निराहार उपवास बसेर साँझपख कुल देवताको पूजा गरी भगवान् सूर्य र छठी मातालाई आमन्त्रण गर्दै खीर, पुरी, लड्डु, केरा र तुलसी पत्रको प्रसाद अर्पण गर्छन्। जलेश्वरनाथ महादेव मन्दिरका सहायक पूजारी कामेश्वर पाठकका अनुसार खरना सम्पन्न भएपछि रातभर अरवा (नुनरहित) भोजन मात्र ग्रहण गर्ने चलन छ।

यस महापर्वलाई मिथिलाञ्चलको महोत्तरी, धनुषा, सिरहा, सप्तरी, सुनसरी, मोरङ, सर्लाही, रौतहट, बारा, पर्सा लगायतका क्षेत्रमा भव्य रूपमा मनाइन्छ। संस्कृतिविद् ध्रुव रायका अनुसार सत्य, अहिंसा र सामाजिक सद्भाव अभिवृद्धि गर्ने यस पर्वमा श्रद्धालु भक्तजन पोखरी, नदी तथा जलाशयमा भीडभाड गर्दै षष्ठीका दिन साँझ अस्ताउँदो सूर्यलाई अर्घ दिने परम्परा छ भने सप्तमीका दिन बिहान उदाउँदो सूर्यलाई अर्घ दिएर व्रत समापन गरिन्छ। धार्मिक आस्थासँगै सामाजिक एकताको प्रतीक बनेको यस पर्व हिन्दू तथा मुस्लिम समुदायले समान उत्साहका साथ मनाउने प्रचलन छ।