सिरहामा जातीय विभेद प्रकरण : अनुसन्धान प्रतिवेदन सरकारी वकिल कार्यालयलाई बुझाइयो

जनकपुरधाम, चैत १५ गते ।  सिरहाको औरही गाउँपालिका–५ मा महायज्ञका नाममा भएको जातीय विभेदको घटनामा प्रहरी अनुसन्धान सकिएपछि बिहीबार (चैत १४) सरकारी वकिल कार्यालयलाई प्रतिवेदन बुझाइएको छ। प्रहरीले जातीय भेदभाव तथा छुवाछूतसम्बन्धी मुद्दाको छानबिन छ दिनमै सम्पन्न गरेको हो। जिल्ला न्यायाधिवक्ता राजेन्द्र बस्नेतका अनुसार अनुसन्धान प्रतिवेदनको अध्ययन भइरहेको छ, जसपछि अभियोगपत्र अदालतमा दायर गरिनेछ।

घटनामा संलग्न भएको आरोपमा यही चैत ९ गते गाउँपालिकाका अध्यक्ष शिवजी यादव र पूर्ववडाध्यक्ष दिलीप यादव पक्राउ परेका थिए। चैत १० मा प्रहरीद्वारा उनीहरूसँगै बजरंगी बाबाविरुद्ध पीडितको जाहेरी लिइएको थियो। गत फागुन १० मा महायज्ञस्थलमा ‘अछूत’ भन्दै दलित समुदायका दीपक मल्लिकको घर डोजर लगाएर भत्काइएको थियो। यस घटनापछि गृह मन्त्रालयले संवेदनशीलता अभाव देखाउँदै सिरहाका प्रमुख जिल्ला अधिकारी वासुदेव दाहाललाई मन्त्रालय तानेको थियो भने जिल्ला प्रहरी प्रमुख रमेश पण्डितलाई प्रहरी प्रधान कार्यालयमा सरुवा गरिएको थियो।