गजेन्द्र नारायण स्मृति अस्पतालको छात्रावासमा फार्मेसी छात्रा मृत फेला

जनकपुरधाम, चैत १४ गते ।  रौतहटको माधवनारायण नगरपालिका-३ स्थित गजेन्द्र नारायण स्मृति अस्पतालको छात्रावासमा डिप्लोमा फार्मेसी पहिलो वर्षमा अध्ययनरत १८ वर्षीया छात्रा सुमन कुमारी बैठा मृत फेला परेकी छन्। बाराको विश्रामपुर घर भएकी सुमन आज बिहान छात्रावासको बाथरुममा झुन्डिएको अवस्थामा फेला परेकी हुन्।

जिल्ला प्रहरी कार्यालय रौतहटका प्रवक्ता, डिएसपी दीपक कुमार रायका अनुसार, घटनाको प्रारम्भिक अनुसन्धान भइरहेको छ। उनले सुमनले आत्महत्या गरेकी हुन् वा उनलाई कसैले जबरजस्ती झुन्ड्याइएको हो भन्ने विषयमा थप अनुसन्धान जारी रहेको बताएका छन्। घटनास्थलबाट संकलित प्रमाणका आधारमा अनुसन्धान अगाडि बढाइएको छ भने शवलाई पोस्टमार्टमका लागि अस्पताल पठाइएको छ। यस घटनाले क्याम्पस तथा छात्रावासमा सुरक्षा व्यवस्थाको विषयमा गम्भीर प्रश्न उठाएको छ। मृतकका परिवारजनले छोरीको मृत्यु शंकास्पद रहेको भन्दै निष्पक्ष छानबिनको माग गरेका छन्। प्रहरी प्रशासनले सत्यतथ्य बाहिर ल्याउन गहिरो अनुसन्धान गर्ने प्रतिबद्धता जनाएको छ। ​