मापदण्ड विपरीत सञ्चालनमा रहेको आनन्द हस्पिटलका सञ्चालक डा. उमेश प्रसाद साह पक्राउ

जनकपुरधाम, चैत १३ गते । मधेश प्रदेशका मुख्यमन्त्री सतीश कुमार सिंहको निर्देशन अवज्ञा गर्दै आएका रौतहटको शिवनगरस्थित आनन्द हस्पिटल तथा एक्युपञ्चरका सञ्चालक डा. उमेश प्रसाद साहलाई प्रहरीले पक्राउ गरेको छ। जिल्ला प्रहरी प्रमुख एसपी दिलीप घिमिरेको निर्देशनमा इलाका प्रहरी कार्यालय शिवनगरका प्रमुख सई बब्लुकान्त झा नेतृत्वको टोलीले उनलाई हस्पिटलबाटै पक्राउ गरेको हो। पक्राउ परेका डा. साहलाई आवश्यक कारबाहीका लागि जिल्ला प्रहरी कार्यालय गौर पठाइएको छ।

मुख्यमन्त्री सिंहले दुई साता अघि अनुगमनका क्रममा आनन्द हस्पिटल मापदण्ड विपरीत सञ्चालनमा रहेको पाइएपछि बन्द गर्न निर्देशन दिएका थिए। तर, डा. साहले उक्त निर्देशन अवज्ञा गर्दै हस्पिटल सञ्चालन जारी राखेका थिए। नियमअनुसार व्यवस्थापन नहुँदासम्म पुराना बिरामीलाई अन्य हस्पिटलमा स्थानान्तरण गरी उपचार गर्नुपर्ने र त्यसको खर्च आनन्द हस्पिटलले व्यहोर्नुपर्ने भए पनि, डा. साहले नयाँ बिरामी समेत भर्ना गरी उपचार गर्दै आएको प्रत्यक्षदर्शीहरूले बताएका छन्। पछिल्लो दुई दशकदेखि उनले अवैध रूपमा हस्पिटल सञ्चालन गर्दै लकवा (प्यारालाइसिस) रोगको उपचारको नाममा लुट मच्चाउँदै आएको आरोप छ। मुख्यमन्त्री सिंहले अनुगमनका क्रममा शिवनगर, गरुडा, र चन्द्रपुरमा मापदण्ड विपरीत सञ्चालनमा रहेका डेढ दर्जन हस्पिटल तत्काल बन्द गर्न निर्देशन दिएका थिए।