धनुषामा बस दुर्घटना: ३० भन्दा बढी घाइते, ६ गम्भीर

जनकपुरधाम, चैत १ गते । धनुषाको धनुषाधाम नगरपालिका–६, मालटोलस्थित पूर्वपश्चिम लोकमार्गमा शुक्रबार बिहान भएको बस दुर्घटनामा ३० जनाभन्दा बढी यात्रु घाइते भएका छन्। जनकपुरबाट राजविराजतर्फ गइरहेको ना ५ ख १४४१ नम्बरको बस शुक्रबार बिहान ९ बजे दुर्घटनाग्रस्त भएको हो।

इलाका प्रहरी कार्यालय ढल्केबरका प्रहरी निरीक्षक जटाशङ्कर यादवका अनुसार दुर्घटनामा घाइते भएकाहरूको उद्धार गरी ढल्केबरस्थित निजी स्वास्थ्य केन्द्र र प्रादेशिक अस्पताल जनकपुरमा पठाइएको छ। उहाँले हालसम्म घाइतेहरूको विवरण सङ्कलन भइरहेको बताउँदै घटनामा करिब ६ जनालाई गम्भीर चोटपटक लागेको जानकारी दिनुभयो। अन्यलाई सामान्य चोटपटक लागेको छ।

प्रारम्भिक जानकारीअनुसार बसको ब्रेक जाम भएर दुर्घटना भएको खुल्न आएको प्रहरी निरीक्षक यादवले बताए। घटनाबारे थप अनुसन्धान भइरहेको छ।