मोटरसाइकल दुर्घटनामा भौतिक पूर्वाधार मन्त्रालयका चालकको मृत्यु

जनकपुरधाम, माघ ११ गते ।  जनकपुरको मधेस भवननजिक भएको मोटरसाइकल दुर्घटनामा भौतिक पूर्वाधार मन्त्रालयका चालक देवेन्द्र यादवको ज्यान गएको छ। यादव, जो लक्ष्मीनिया गाउँपालिका वडा नम्बर १ निवासी हुन्, आज बिहान कार्यालय जाँदै गर्दा दुर्घटनामा परेका थिए।

प्रहरीका अनुसार विपरीत दिशाबाट विद्यार्थीले चलाएको मोटरसाइकलले ठक्कर दिँदा यादव सवार मोटरसाइकल दुर्घटनाग्रस्त भएको थियो। ज १ ब ७५५ नम्बरको मोटरसाइकललाई मधेस प्रदेशको २-०२-००४ प ८१९६ नम्बरको मोटरसाइकलले ठक्कर दिएको बताइएको छ। टाउकोमा गम्भीर चोट लागेका यादवलाई उपचारका लागि लैजाने क्रममा मृत्यु भएको जनाइएको छ। ठक्कर दिने मोटरसाइकल चालकसहित दुई जना हाल प्रहरी नियन्त्रणमा छन्।