सवारी दुर्घटनामा चार जनाको मृत्यु

जनकपुरधाम, पुस १८ गते । भोजपुरको षडानन्द गाउँपालिका-१२ याङपाङस्थित सडकमा भएको दुर्घटनामा ट्याक्टरबाट लडेर ४८ वर्षीया धनकुमारी राईको घटनास्थलमै मृत्यु भएको छ। अरुण गाउँपालिका-१ मेहेनपुर निवासी राईको दुर्घटना बुधबार दिउँसो भएको हो। घटनापछि ट्याक्टर चालकलाई प्रहरीले नियन्त्रणमा लिएको छ।

रूपन्देहीको मायादेवी गाउँपालिका-५ गोनाहास्थित सडकमा पिकअपले साइकल यात्रीलाई ठक्कर दिँदा ५० वर्षीय नरभदेश्वर दुवेको ज्यान गएको छ। गम्भीर घाइते भएका दुवेको चौराहा अस्पताल बुटवलमा उपचारको क्रममा बुधबार राति मृत्यु भएको हो। ठक्कर दिने पिकअप चालकलाई पनि प्रहरीले नियन्त्रणमा लिएको छ।

धनुषाको जनकपुरधाम उपमहानगरपालिका-१९ थुमौनास्थित सडकमा अनियन्त्रित मोटरसाइकल दुर्घटनामा ३५ वर्षीय सिकिन्द्र यादव र ३२ वर्षीय नन्दलाल यादवको मृत्यु भएको छ। सिकिन्द्रको प्रादेशिक अस्पतालमा र नन्दलालको न्यूरो अस्पताल जनकपुरमा उपचारको क्रममा मृत्यु भएको हो। प्रहरीले दुर्घटनाका सम्बन्धमा अनुसन्धान गरिरहेको जनाएको छ।