लाखौँ मूल्यको अवैध सालको काठसहित पिकअप भ्यान बरामद

रौतहट, मङ्सिर १४ गते।  सशस्त्र वन सुरक्षा गस्ती टोलीले बिहीबार लाखौँ मूल्य बराबरको अवैध सालको काठसहित पिकअप भ्यान बरामद गरेको छ। विशेष सूचनाका आधारमा रेन्जर विकास लामिछानेको नेतृत्वमा गएको टोलीले महेन्द्र राजमार्गको धनसरदेखि दुई किलोमिटर पूर्व लचकामा ना २ च ९३१९ नम्बरको बोलेरो पिकअप नियन्त्रणमा लिएको हो। पिकअपमा वनको घाटगदीबाट लोड गरिएको ८५.५ क्युफिट सालको काठ बरामद गर्नुका साथै चालक जितेन्द्र चौधरीलाई पक्राउ गरिएको जिल्ला वन अधिकृत राजेश कुमार साहले जानकारी दिएका छन्।

डिभिजन वन कार्यालय चन्द्रनिगाहपुरका प्रमुख हेमन्त कुमार साहका अनुसार बरामद काठ ९ थान सालको गोलिया रहेको छ, जसको बजार मूल्य ३ लाख रुपैयाँभन्दा बढी छ। गाडी र चालकलाई अनुसन्धानका लागि डिभिजन वन कार्यालय चन्द्रनिगाहपुरमा राखिएको छ। यस घटनाबारे थप अनुसन्धान भइरहेको वन कार्यालयले जनाएको छ।