मकवानपुरमा बस दुर्घटना: १७ घाइते, १ को अवस्था गम्भीर

हेटौँडा, मंसिर ७। वीरगन्जबाट पोखरा जाँदै गरेको ग २ ख १६२१ नम्बरको यात्रुबाहक बस ब्रेक फेल भएर चुरियामाई मन्दिर नजिकैको रातोपाटे क्षेत्रमा दुर्घटना हुँदा १७ जना यात्रु घाइते भएका छन्। बसमा १८ जना सवार थिए, जसमा चालकसहित अधिकांश घाइते भएका छन्।

मकवानपुर प्रहरीले दिएको जानकारी अनुसार, बाराको पर्सैनी गाउँपालिका–३ की ९ वर्षीया जोनीशा कुमारी ठाकुरको अवस्था गम्भीर रहेको छ। उनको टाउकोमा चोट लागेको छ, र हाल हेटौँडा अस्पतालमा उपचार भइरहेको छ। दुर्घटना पूर्व–पश्चिम सडक खण्डमा भएको हो, र घाइतेहरूको उद्धार गरी अस्पताल पुर्‍याइएको छ।